Days are slow and years are fast

“Days are slow and years are fast.”
مقولة قريتها مرة…
من سنين..
و رنت معايا..
ازاي وولادي صغيرين كنت حاسة الأيام بتمشي ببطء
و اني مستهلكة من المجهود معاهم..
لحد ما ابني في مرة قال لي انه مش طالع المصيف معانا علشان عنده دوري كورة
يومها بصيت له بذهول..
و كأن حد صحاني من غيبوبة..
يومها فهمت مقولة ان الأيام بطيئة و السنوات سريعة..
اخدت بعدها فترة باحاول استوعب اللي حصل..
و بدأت اعيش كل يوم.. حياة.. مش مهام و مسؤوليات وواجبات و شغل.. لا حياة
اضحك من قلبي
اتامل السما
اتفرج على ملامح ولادي بحب
اسمع مزيكا
اقرأ حاجة مفيدة
اكل حاجة صحية
اشرب مياه اكتر
احرك جسمي علشان أفضل نشيطة
احمد ربنا على النعم اللي ما كنتش مركزة فيها..
و كأني شفت الحياة من تاني بس لما قال لي انه اللي اعتبرته عادي و مألوف مش دايم
حي على الحياة
كل يوم بيفرق
السنين بتجري
اوعي تعيش ميت
موت حي في قلوب الناس

Share