يا ترى بنعرف ولا مش بنعرف؟

من سبتمبر 2018 و أنا باتكلم عن المراهقين من تجربتي كلايف كوتش وكمدربة.. باكتب عن لمبات كتير نورت عندي سواء خلال جلساتي الفردية مع المراهقين او من خلال تعاملي معاهم خلال ورش العمل اللي باقدمها او من خلال شغلي مع الفريق.. لمبات ملتني حزن.. حزن على حال المراهق البائس.. ونفس اللمبات ملتني حماس، اني اكتب واتكلم..
…………………………………….……………………………
اللمبة:
انجي طالبة في المدرسة. انضمت لبرنامج قيادة الذات اللي باقدمه من اكتر من سنة. ولما فتحنا باب الإشتراك في فريق خدمة المجتمع انضمت. مرت اسابيع وانجي بتشتغل مع مجموعتها ضمن الفريق الكبير. وخلال الشغل على المشروع انجي تواصلت معايا، طلبت نمرة المسئولة في مستشفى الأورام. وبعد كام يوم بدأت انجي تتواصل معايا تاني بخصوص التبرع المطلوب. ومرت الأسابيع وفي يوم سألت قادة المجموعات عن اسماء احسن ناس بتشتغل معاهم. واسم انجي كان من ضمن الأسماء. من احسن الناس اللي اشتغلت مع مجموعتها.
يوم السبت الفريق نزل يسلم التبرعات ويعمل نشاط ترفيهي للأطفال المرضى. انجي كان معانا. تواصلت مع الأطفال وتعاملت معاهم. وبعد الزيارة اجتمعنا علشان نقييم التجربة ونفكر اتعلمنا منها ايه.
لما جيه دور انجي اتكلمت. شرحت ازاي كانت “فاكرة” انها مش هاتعرف تتواصل مع المسؤلة في المستشفى. وانها لما “جربت” كانت “مكسوفة” في الأول. وبعدين بعد كام مرة من التواصل مع المسؤلة لاقت نفسها عرفت تتكلم. واكتشفت عن نفسها انها “بتعرف تتواصل”.
تأملت حال انجي. طالبة خلال السنة الدراسية. بدل ما تحبس نفسها مع المذاكرة، بتنضم للفريق. بتجرب بالرغم من كسوفها انها تعمل حاجة هي فاكرة انها مش هاتعرف تعملها. بتجرب مرة واتنين لحد ما بتكتشف انها تعرف. ليه؟ لأنه لغيرها. لأن الدافع هو خدمة الغير. هو انها تعمل فرق في حياة غيرها.
ناس كتير بتكسل تنزل او تتعلم او تتحرك لما يكون الهدف خاص بيهم.. انما لو لغيرهم بيتحركوا. مثلًا امهات كتير بتحضر اكل لولادها وتيجي على نفسها وتقول مفيش وقت او مش مهم.
فكرت في حالنا وفي تجربة انجي. انجي علشان تخدم فعلا احتاجت تنمي مهارة التواصل. احتاجت تزق نفسها وتجرب. كام حد فينا بيشتغل على نفسه علشان يخدم احسن؟ وكام حد فينا بيجري في دوامة الحياة وشايف ان مفيش وقت. كام حد فينا بيعامل نفسه اولوية؟
لو عايزين نعمل فرق مش كفاية اننا نخدم او نتطوع. محتاجين ننمي نفسها ونطور مهاراتنا ونجرب علشان نخدم بشكل افضل.
ياللا نتعلم من انجي.. ايه حاجة شايف او شايفة انك مش هاتعرف تعملها؟
جرب.. واحتفل لما تكتشف انك بتعرف.

Share