ما بأنفسنا – رحلة روحانية.. استكشافية..اصلاحية

رحلتي لإصلاح نفسي بدأت من اكتر من عشرين سنة، ولازالت مستمرة.
رجعت خلال الرحلة دي لمراجع كتير، أولها القرآن الكريم، و صحيح الحديث، وحضور دروس ذكر وتحفيظ وتفسير. وانضميت ودرست جزء من برنامج رؤية لنسيبة عبدالعزيز العلي المطوع. وبعد سنين بدأت اقرا للمفكرين الأجانب. حاولت افهم المشترك بين الشرق والغرب و بين الرسالات المختلفة وتدبرت سور من القرآن و توليت تدريس تدبر القرآن لسنين لطلاب في الصفوف الإعدادية.

استمتعت خلال الرحلة باكتشاف جوانب في نقسي كنت جاهلة عنها. وسعيت لإني اتعلم ازاي أقود ذاتي واغذي روحي واعالج قلبي أملًا بأني احظى بحياة طيبة في الدنيا وفي ان ربنا يتغمدني برحمته في الآخرة.

من خلال شغلي ككوتش وكمدربة لاحظت ان ناس كتير بتعاني وبتتخبط في الحياة. فكرت في أمراض القلوب وعلاقتها بتغيير النفس.. وازاي ربنا سبحانه وتعالي بيغير الإنسان لما الإنسان بيبدأ بتغير اللي في نفسه. ومن هنا فكرت اني أقدم برنامج “ما بأنفسنا” اللي باتمني بيه مساعدة غيري ونفسي في مراجعة ودراسة اللي في قلوبنا من أمراض كخطوة أولى في طريق الحياة الطيبة.
البرنامج مش بيقف عند الإكتشاف وإنما هنتعلم خلال البرنامج ازاي نصلح قلوبنا خلال الشهر المبارك وفي حياتنا من بعده، فنشوف التغيير في حالنا وإصلاح قلوبنا وعلاقتنا بالله عز وجل.
البرنامج للنساء فقط، تلاتين حلقة، تلاتين يوم خلال شهر رمضان المعظم.

Share