جواب مديرة المدرسة اللي كان له تأثير محوري

امبارح كانت حفلة تخرج بنتي من المدرسة. ابني اتخرج من 3 سنين من نفس المدرسة.. مدرسة دخلوها من فصل Baby class وفضلوا فيها لحد التخرج.. كل واحد فيهم قضى فيها 15 سنة. وبفضل الله ماحدش فيهم اخد اي درس في اي مادة واتنقلوا من سنة لسنة بسلام وبنتايج مشرفة. وقفت استرجع شريط الذكريات ولمبات كتير قوي نورت. فكرت في ولادي ورحلتهم مع التعليم. وحسيت بإمتنان عظيم لناس كتير قوي ساهمت في تربيتهم ونشئتهم ونموهم.. لاقتني بافكر في غيري اللي تعبان من المدارس وبافكر في تجربتي وشريط الذكريات..
مدام فرنسواز، مديرة المدرسة الإبتدائية..واللي في أول يوم لإبني في الحضانة بعتت جواب للأهل، بتشرح فيه دور المدرسة مع الأطفال وان الأهل مش مطلوب منهم يذاكروا لأولادهم وان لو ابني محتاج شرح او عنده طلب ابعته للمدرس.. نصيحة محورية فرقت معايا جدًا.. من ناحية انا كأم ما كانش مطلوب مني العب دور المدرس، ومن ناحية المدرس شاف ولادي ناس مجتهدة بتسأل وتطلب شرح ازيد علشان تتعلم..
ذكريات.. شفت مُدَرسة في ابتدائي بتاخد بنتي في الفسحة للمكتبة وتبعت لي أفكار لأنشطة نلعبها مناسبة للكتاب الإضافي اللي مطلوب من بنتي تقراه علشان تتحسن في العربي..
ذكريات..استاذ اللغة العربية في اعدادي اللي كان بيقعد مع ملك في الفسحة يساعدها في العربي، وغنى لها النحو ولحنه علشان تفهم وتستوعب وكانت بترجع تقول قد ايه المدرس صبور وهو بيفهمها.. ذكريات.. نفس المدرس الصبور، في مشروع القرآن، بيدرب ملك على الإلقاء ويشجعها تشتغل على البحث وتجتهد، وتفوز مع مجموعتها بالجايزة الأولي.. مساعدة بحب وتفاني خليتها تبذل مجهود حقيقي من قلبها..
ذكريات.. مدرسين الإنجليزي وهما بيساندوا ملك ويشجعوها ولحد ما يوصل الإنجليزي بتاعها كأنه لغة أولى بالرغم من انها في القسم الفرنساوي… انشطة في الفصل، وادوات وملابس بتتاخد من البيت علشان تتعلم باستمتاع ومرح..
ذكريات..مدرسة اللغة العربية اللي تعرف ان ابني بيحب الكشري فتبعت له علبة من عمل ايديها.. بحب..
ذكريات..دكتور التربية الرياضية اللي بيشرف على الرحلات.. ويسهر ليل ونهار في المعسكرات علشان يطمن على ولادي اللي بيعتبرهم ولاده..
ذكريات..مديرة المدرسة الإعدادي اللي بتشرف على ولادي في رحلات بره مصر وبتابعهم سنة ورا سنة علشان يعدوا سن المراهقة بسلام..
ذكريات.. مدرس العلوم اللي بيركز ما يلبسش برتقالي يوم حصصه مع ملك علشان اللون بيضايقها..ومدرسة العلوم اللي بتشجعها وتشكر في كراريسها واجتهادها وبالتالي تخليها بتقدم احسن ما عندها…
ذكريات.. مس لمياء.. وقصص بوسي وبوسات علشان الولاد يتربوا على قيم واخلاق من خلال القصص بدل الوعظ المباشر..
ذكريات.. مدرسين الرياضيات اللي بيعملوا مسابقات ورحلات تعليمية تخلي ولادي يحسوا بالأرقام ويستوعبوا استخدامها في الحياة مش بس على السبورة..
ذكريات.. مع مدرسين الفرنساوي.. واحدة تدرب ملك على التمثيل وبتطلع تتكلم وتمثل بمنتهى الطلاقة بعد ما بتحمسها تاخد دور كبير لو اجتهدت..وواحدة تشد على ملك وتحفزها انها تبذل اقصى جهد عندها (مش بالنسبة لزمايلها انما عندها هي)
ذكريات.. مع مدرسين التربية الفنية اللي نموا فكر ولادي وتذوقهم للفن وقيمته مش بس نموا مهاراتهم
ذكريات.. سواقين وصلوا ولادي وجابوهم في سنوات دراسية طويلة ورحلات ومعسكرات.. والحمد لله كانوا اهل للأمانة..
ذكريات.. دادات كانوا امهات لولادي ولو حد كان عيان فغاب يسألوا عليه ويدعوا له يقوم بالسلامة..
ذكريات.. رجالة أمن استلمت منهم ولادي لسنين وهما واقفين على رجليهم بيحرسوا الولاد..
ذكريات.. الإدارة والإستماع للمساعدة والرد حتى على الطلبات الصغيرة او المفاجأة..
وقفت وفكرت يا ترى ما كانش عندي مشاكل مع المدرسة؟ هل كانت الحياة وردي في وردي؟
اكيد لا.. كان عندي.. يا ترى ذكرياتي معاهم ايه؟
الأسبوع الجاي اكمل..
ولحد ما نتقابل.. محتاجين نفكر كويس بندخل ولادنا مدارس ايه..رسالة المدرسة اللي بنخترها ايه؟ وهل فعلًا متحققة؟
مؤسس المدرسة شرح رسالة المدرسة..اللي باختصار بتقول “طلاب محبين للتعلم، يلاقوا في المدرسة مناخ اهتمام وحب، يساهموا في انهم يجعلوا العالم مكان افضل..”
شكرًا على الرسالة.. ولادي كانوا زي البذرة الصغيرة اللي اتروت بالحب من جيش متفاني في المدرسة وبيحبوا التعلم جدًا وبيسعوا يخلوا مجتمعهم مكان افضل…
تابعوني الإسبوع الجاي

Share