ثقة ملك في نفسها واللي عملته والدتها

ملك طالبة في ثانوي، اشتركت في برنامج قيادة الذات اللي باقدمه للمراهقين من قرب السنتين. بعد اشتراكها بكام شهر انضمت للفريق المنظم للبرنامج. بدأت تلعب ادوار مختلفة، تصور، تنزل محتوى على صفحتنا على الإنستاجرام، تعمل فيديوهات عن المعسكرات اللي بنقدمها، تقود العاب خلال المعسكرات.. اكتر حاجة استهويتها وكانت متميزة فيها هي الفيديوهات. بتاخد منها وقت صحيح، انما فعلًا بتعمل فيديوهات حلوة. من كام شهر والدة ملك اشتركت في نفس البرنامج، انما اللي باقدمه للسيدات. اشتركت بعد الحاح شديد من ملك انها تشترك. ومن كام يوم والدة ملك بعتت لي فيديو. سمعته ولمس مشاعري بالإلقاء والصوت واختيار الكلمات.. سألتها لو ده كان صوتها.. وكان ردها انه صوتها، صوت والدة ملك، ومن انتاج ملك. انبهرت.. اتأثرت.. ولمبة نورت!
اللمبة..
ملك نمت مهاراتها بشغلها مع الفريق.. وركزت على الدور المتميزة فيه.. ومش بس استغلت المهارة دي مع الفريق ولا في مدرستها – زي ما كانت بتحكي لي انها بتنتج فيديوهات للمدرسة – لأ، ملك كمان استخدمت المهارة دي مع اقرب الناس لها..والدتها..!
ووقفت وسألتني..يا ترى كام حد فينا بيشحع ولاده ينموا مهارات مش مدرسية..؟
وكام حد فيهم بيشجعهم يشتغلوا بالمهارة دي زي ما ملك بتشتغل معانا..؟
والأهم، كام حد فينا كأولياء أمور، بيطلب من ولاده يساعدوه بالمهارة دي علشان هما نفسهم يتطوروا ويقدموا حاجات ملهمة زي اللي والدة ملك قدمته..؟
كتير منا ممكن يلجأ لولاده للمساعدة في الترفيه.. ضبط لي النت علشان ادخل على الفيس بوك.. او نزل لي الفيلم الفلاني.. انما تعالى انت وانا نتكامل وننتج مع بعض انتاج مشترك كل واحد فينا بملكاته وموهبته؟! ايه الجمال ده..؟!
وقفت وفكرت في علاقة ملك ووالدتها.. وازاي ممكن تاخد منحنى مختلف.. مش بس أم وبنتها.. لا شركاء في اهداف، شركاء في تقديم قيمة لغيرهم كل حد فيهم بموهبته!
وبدل ما تنحصر العلاقة بين ملك ووالدتها في: ذاكرتي وخلصتي الواجبات ولبستي الشبشب وكفاية الموبايل.. تتحول لإيه رأيك في اختيار الكلمات.. ونبرة صوتي.. وتسلم ايديكي يا ملك على الفيديو..
ويحصل ايه لملك؟
ثقتها في نفسها وامكانياتها تزيد.. ونظرتها لأمها تتغير..
تشوفها ست مصرية موهوبة ومؤثرة.. مش منحصرة في شغل البيت وبس..
ياللا ننمي مواهبنا ونلعب ادوار مؤثرة في المجتمع
ياللا نتعاون ونتكامل مع ولادنا، كل حد فينا بملكاته..
ياللا نتحول لعيلة مؤثرة في المجتمع..
ياللا ننهض ببلدنا..
مصر بتنادينا، مصر دين واجب علينا..
بينا لنهضة مجتمعية..
اللينك بتاع الفيديو اللي بصوت والدة ملك ومن صنع ايدين ملك في اللينك ده:
“الناس معادن”

Share