بروفسوار الكيمياء..

من سبتمبر 2018 و أنا باتكلم عن المراهقين من تجربتي كلايف كوتش وكمدربة.. باكتب عن لمبات كتير نورت عندي سواء خلال جلساتي الفردية مع المراهقين او من خلال تعاملي معاهم خلال ورش العمل اللي باقدمها او من خلال شغلي مع الفريق.. لمبات ملتني حزن.. حزن على حال المراهق البائس.. ونفس اللمبات ملتني حماس، اني اكتب واتكلم..
…………………………………….……………………………
اللمبة:
البروفسوار.. مش استاذ في الجامعة ولا مدرس في مدرسة. ده طالب في اولى ثانوي!
امين، واحد من اللي اشتركوا في برنامج قيادة الذات اللي باقدمه. خلال رحلة الفيوم اللي نظمناها في مارس طلع معانا… بعد الغدا ناديت على المجموعة لاقيت امين بيتكلم مع حد.. ناديت عليه اكتر من مرة وهو مش سامع.. قربت ونادت مرة كمان وسألته بيعمل ايه، وضح انه بيشرح كيمياء للي بيتكلم معاه.
مر اسبوعين وقابلت امين تاني. المرة التانية كان في زيارة خدمة المجتمع للأطفال مرضى السرطان. واحنا في الأتوبيس لاقيت امين بيشرح كيمياء لواحدة من المجموعة، وهي بتكرر وراه الشرح. بصيت لامين باعجاب. طالب بيدرس فرنساوي بجانب المدرسة، وبيشترك في برنامج قيادة ذات، وبيشارك في خدمة المجتمع وبيخصص وقت للترفيه والرحلات. بعدها بثواني لاقيت امين بيشرح انه هو وعمر – من فريق المراهقين الخاص بالبرنامج – عاملين جروب اسمه البروفسوار امين وعمر.. وفي الجروب ده بيسجلوا فيديوهات شرح للناس اللي معاهم من البرنامج علشان يساعدوهم. طبعًا انبهرت من الفكرة..
وفكرت..
يا ترى بلدنا هتبقى عاملة ازاي لو فيه طلبة بتفكر في انها تساعد غيرها في المواد اللي هي متميزة فيها؟
يا ترى حال بلدنا والدنيا هيبقى ازاي لو استبدلنا عقلية “علشان اكسب اخسر غيري” بعقلية “كلنا نكسب” اللي عرضها المؤلف العالمي ستيفن كوفي في كتابه عن العادات السبعة للأفراد الأكثر فاعلية؟
يا ترى مستقبل بلدنا هيبقى عامل ازاي لو المراهقين بدأوا يملوا وقتهم بأنشطة هادفة ومفيدة زي امين اللي بيروح رحلة ويخدم مجتمعه ويساعد غيره وبيذاكر وبيتعلم لغة زيادة علشان يصنع مستقبله؟
يا ترى حالنا هيبقى عامل ازاي لو بطلنا نكابر وبدأنا نطلب مساعدة ونقول احنا ضعاف في ايه ونطلب من اللي حوالينا يساعدونا نتقدم بدل ما نفضل نكابر وندعي اننا مش محتاجين حد؟
ويا ترى حال مصر هيبقى ازاي لو كل فرد اكتشف نقطة تميزه وبدأ ينفق منها ويساعد غيره زي ما امين عمل؟
قوم يا مصري.. مصر بتناديك..
قوم بانك تربي ولادك يكونوا افراد في مجتمع مش ناس منعزلة انانية..
او قوم بانك تحسن نفسك وتطورها..
او قوم بانك تساعد غيرك باللي معاك..
او قوم بانك تعترف بضعفك وتطلب مساعدة..
قوم بدل تضييع الوقت في الشكوي او الترفيه غير البناء..
قوم.. خلي الدنيا تقوم بيك!

Share