المراهق ما بين مربي فنان وناظر محاسب

#Teenagers#Life_lessons#Strategies#Results

من سبتمبر 2018 و أنا باتكلم عن المراهقين من تجربتي كلايف كوتش وكمدربة.. باكتب عن لمبات كتير نورت عندي سواء خلال جلساتي الفردية مع المراهقين او من خلال تعاملي معاهم خلال ورش العمل اللي باقدمها او من خلال شغلي مع الفريق.. لمبات ملتني حزن.. حزن على حال المراهق البائس.. ونفس اللمبات ملتني حماس، اني اكتب واتكلم..
…………………………………………………………………………………
اللمبة:
يوم السبت اللي فات كان عندنا المقابلة الشهرية للمراهقين اللي اشتركوا في برنامج The BULLET Teens . ملك مصطفى، واحدة من المشتركين كان بقالي كام شهر ما قابلتهاش، جات المقابلة ده. سلمت عليا بحرارة واندمجت مع المحتوي العلمي اللي كان بيتقدم ولما جيه دورها انها تقول استفادت ايه اخر المقابلة قالت “اني مبسوطة” ما كانتش مشاركتها عن النوم – زي موضوع الإجتماع – ولا عن استفادة علمية انما كان تعلقيها انها اتبسطت. اتبسطت انها خرجت وقابلتنا. نوران – قائدة الإجتماعات الشهرية، اضافت انها عايزانا نحيي ملك لأن ملك بعد اشتراكها في البرنامج بقت بتتواصل مع مامتها بشكل افضل واكتر وبالتالي علاقتهم اتحسنت. ملك وشها كان اصلا مبتسم، الإبتسامة بقت اوسع بعد سماعها كلام نوران وبعد ما شجعناها. وقبل ما ملك تمشي قدمت لي هدية، شكرتني وقالت لي: “شكرًا، أنا فعلًا اتغيرت”.
بعد ما الناس مشيت، جات واحدة من الفريق وقالت لي: “مامي طلبت مني اني اشكرك، لأن واحد من مدرسيني قال لها اني السنة دي احسن واني اتغيرت.” و بعد ما مشيت، اتنين تانيين من اللي كانوا حاضرين المقابلة بعتوا يشكروني انهم “اتغيروا”.
في نفس اليوم اربع بنات بيشكروني على إن البرنامج غيرهم. واحدة على انها بقت مبسوطة في حياتها اكتر وان علاقتها بمامتها بقت افضل، وواحدة على ادائها في الدراسة اللي اتحسن وواحدة على مهاراتها الإجتماعية اللي اتطورت والأخيرة على ثقتها في نفسها اللي زادت.
فكرت في البنات دول، منهم اللي اشتركت في البرنامج في شهر فبراير اللي فات، ومنهم في شهر يوليو، والحاجة المشتركة بينهم انهم اتغيروا. كل واحدة فيهم اتغيرت بسرعة مختلفة وفي اتجاه مختلف، انما كلهم اتغيروا.
والسؤال الوجودي اللي الح عليا، ليه كأهل بننتظر ان يا ولادنا يتحولوا في يوم وليلة يا نتهمهم انهم مش بيتغيروا؟ ليه مش بنركز في التقدم البسيط ونشجعهم بسببه ونحمسهم انهم يكملوا؟ ليه بنقارنهم بزمايل او اقارب او اصحاب بدل ما نقارنهم بنفسهم؟
المراهق محتاج فنان مربي مش محاسب ولا ناظر. فنان بيلاحظ التفاصيل الدقيقة وبيوقر ويحترم التميز فيها. مربي فنان، بيربي انسان علشان الإنسانية.

Share