الخطاب الخامس: التعامل مع الخزانات الفاضية

من كام سنة قريت كتاب لجون جراي، صاحب مدرسة الرجال من المريخ والنساء من الزهرة. الكتاب كان دسم جدًا وشيق جدًا. بعدها بكام شهر بدأت ادرس كوتشينج بمدرسة جون جراي واخدت شهادة معتمدة ككوتش منها. من الكتاب ومن الدراسة اتعلمت عن الخزانات. جون جراي شرح ان كل انسان عنده احتياجات وفقًا للمرحلة السنية.. فكل مرحلة محتاج يوصل له حب وقبول ودعم من مجموعة معينة.. وكل ما يكبر الإحتياج بيكون من مجموعة اضافية بجانب المجموعات اللي قبلها. يعني الطفل المولود محتاج حب من والديه. لما يكبر شوية بيحتاج من اخواته وجدوده وعيلته وأصدقاؤه بالإضافة لوالديه..ولما يكبر شوية بيحتاج لإحتواء من كل اللي فاتوا بالإضافة إلى دعم ومساندة وقبول من زملاء وناس تشاركه اهدافه.. ممكن تكون اهداف رياضية او فنية او لخدمة المجتمع..المهم ناس معاه في نفس الأهداف.
وجون جراى شرح ان من سن سبع سنين لأربعتاشر سنة اهم دعم بالنسبة للإنسان بيكون العيلة والأصدقاء..ومن اربعتاشر لواحد وعشرين سنة اهم دعم بيحتاج له المراهق بيكون من الأصدقاء والزملاء والمشاركين لأهدافه.. طيب ايه علاقة ده بالكورونا؟ واولادنا المراهقين؟
ولادنا المراهقين اللي في سن ما بين 14 و21 – وفقًا لجون جراي – محتاجين، علشان صحتهم النفسية، محتاجين وجود لأصدقاء وزملاء وناس تشاركهم نفس الهدف. قبل الكورونا ده كان بيبقى متاح بالمشاركة في الرياضة او السفر او لعب بلاي ستيشن او فسح..
وحاليًا؟ حاليًا المراهق مزنوق في كورنر.. ناس قليلة سامحة لولادها تخرج وكأن مفيش خطر اصابتهم بالكورونا. وناس كتير حابسة ولادها.. وناسية او متناسية او مش عارفة كلام جون جراي واهميته.
مراهق خزان الحب والإحتواء بتاع المرحلة العمرية اللي هو فيها فاضي.. زي الصحراء الجرداء.. لا هاتطرح سلوك ايجابي ولا هتضلل على حد بشجرها ولا هتكون ممتعة لتقضية وقت معاها/فيها..
وبالتالي محتاج كولي امر..
استوعب اني ابني/بنتي عنده خزان فاضي محتاج يتملي
استوعب اني ابني/بنتي سلوكه هايبقى مش احلي حاجة في الفترة دي
استوعب ان ابني/بنتي مضايق ومخنوق ومش فاهم هو مضايق وتعبان ليه او يعبر عن احتياجاته ازاي
استغل الفترة دي اني ادي له مساحة يتعلم يتواصل مع مشاعره ويعبر عنها بأسئلة بسيطة زي حاسس بإيه؟ وايه كمان؟والإحساس ده بيحسسك بإيه؟ وبتحس الإحساس ده فين في جسمك؟ والأحاسيس دي مأثرة عليك ازاي؟ محتاج مني ايه؟ اساعدك ازاي؟ ايه الدعم اللي محتاج له مني؟
افكر معاه او اشجعه يفكر/يبحث عن طرق بديلة يملا بيها الخزان الفاضي..مثلًا يلعب مع اصحابه اون لاين.. او يتمرن هو واصحابه اون لاين.. او يختاروا كتاب ممتع ويبدأوه ويتسابقوا في انهم يلخصوه او يتفرجوا على فيلم في نفس الوقت كل واحد من بيته ويتناقشوا فيه.. او….
اكون قدوة في ازاي انا باملا الخزان ده.. لأن جون جراي وضح ان كل مرحلة بنحتاج فيها خزان بالإضافة الى كل ما سبق في المراحل اللي قبلها.. فأنا كولي امر محتاج اكون قدوة في ازاي باملا خزان الأصحاب والزملاء خلال فترة الكورونا..

الموضوع سهل؟
لا.. لا مش سهل..
وده بيفكرني بمقولة قريتها زمان، مقولة بتقول اعمل الصح مش السهل
“Do what’s right, not what’s easy.” Roy T. Bennett
الصح اننا نربي ولادنا.. في وقت العسر واليسر.. وقت الدراسة ووقت الصيف.. وقت الصحة ووقت المرض.. وقت ما احنا تعبانيين ووقت ما احنا بصحة..
الموظف بياخد اجازة.. انما المربي مش بياخد.. وعلشان كده التربية هي اعظم رسالة للإنسان اللي عايز يسيب اثر..
قوم يا مصري مصر دين واجب عليك..
قوم يا مصري.. مصر هاتقوم بتشجيعك لقرة عينيك..
قوم يا مصري ولادك كنز مصر..ولادك كنز مصري..
علم ولادك يملوا خراناتهم يا مصري..ولادك اعظم اثر هتسيبه للدنيا من بعديك..
#مراهق_في_زمن_الكورونا

Share