الخطاب الثامن: القدوة

يابني اتعلم من غلطتي.. اوعى تشرب سجاير زيي.. دي مؤذية للصحة جدًا..
يابنتي نامي بدري..وكفاية أكل سكر وحلويات..
يابني العب رياضة….وقوم ذاكر..
يابنتي..علقي هدومك ووضبي اوضتك..

أوامر.. للأسف احيانًا كتيرة بنقع في فخ كأولياء أمور.. فخ اسمه المأمور.. بنتعامل مع ولادنا اننا المأمور وهما عبد المأمور.. المأمور عنده توقعات غير منطقية.. عايز عبيده (اللي هما ولاده) يناموا بدري وياكلوا صحي ويلعبوا رياضة ويصلوا ويردوا بادب ويتحلوا بالأخلاق الحميدة ويستغلوا وقتهم في حاجات مفيدة زي القراءة او الهوايات ويقوموا يساعدوا في البيت ويحبوا اخواتهم ويحترموا مدرسينهم ويعيشوا كأنهم ملايكة بجناحين بس عايشين في وسط البشر..
خطابي النهارة للمأمور..
سيدي المأمورابنك وبنتك، وبنتي وابنتي مش عبيد.. كل حد فيهم إنسان..
يعني ايه إنسان..؟ يعني بينسي.. وبيخطئ..ده المتعارف عليه..
ويعني بيتعلم بالقدوة مش بالدروس والمحاضرات والأوامر.. وده المتعارف عليه واللي بنتغافل عنه ونعمل مش عارفين..
ويعني، والأهم، سلوكه وتصرفاته مرايا.. مرايا لسلوك وتصرفات اكتر ناس بيتعامل معاهم..
لأن السلوك معدي..
يعني ايه؟
يعني الإنسان من مجرد تواجده مع ناس بشكل دوري بيبدأ يتعدي بالسلوك والتصرفات والألفاظ بتاعتهم بدون وعي.. ويلاقي نفسه بعد فترة بقى مثلًا بيشتم.. او بقى عصبي..او بقى متفائل.. ليه؟ لأنه إنسان.. من ضمن طبيعته وطبيعة خلقه انه بيتعدي.. علشان كده رسولنا الكريم عليه الصلاة والسلام قال في حديثه الشريف الصحيح:” الرجل على دين خليله، فلينظر أحدكم من يخالل.”
يعني محتاجين ايه..؟ يعني محتاجين نعرف ان اخلاق ولادنا مرايا لأخلاق للي بيتخالطوا بيهم..
في زمن الكورونا، غالبًا ولادنا بيتخاطوا بينا اكتر من اي حد..
ومن وجهة نظري المتواضعة دي فرصة عظيمة إننا نشوف نفسنا وسلكونا وتصرفاتنا واخلاقنا والفاظنا في المرايا اللي ولادنا ماسكينها..
ونسأل نفسنا..
يا ترى احنا فعلًا قدوة..؟
يا ترى انا راضي عن نفسي؟ عن سلوكي، عن تصرفاتي، عن عاداتي؟
ولو لأ… فارجوك سيدي المأمور استقيل من هذا الدور وتخلص من هذة الفكرة السامة إن ابنك المواهق ملاك أو عبد..
وابدأ اشتغل على نفسك انت.. ولما ترتاح في مرايتك وقتها بس هتبدأ ترضى عن فلذات اكبادك..

في شهر يوليو كان عندي لقاء من دينا فريد – معالج نفسي محل ثقة وتعاملت معاها شخصيًا..
خلال الحوار دينا شرحت اكتر من مرة اننا علشان ندعم ولادنا نفسيًا محتاجين “احنا نشتغل على نفسنا..”

اسهل حاجة اني ادي أوامر واعاقب..
الشجاعة والقوة الحقيقية للمربي إنه يكون قدوة وما يطلبش من ولاده حاجة هو نفسه مش بيعملها..

خطابي مؤلم؟ صعب؟ ايه أهم من إننا ندي للدنيا ولاد متربية فعلًا كويس تحمل راية الإنسانية من بعدنا؟

قوم يا مصري مصر دين واجب عليك..
قوم يا مصري.. مصر هاتقوم بتربيتك لقرة عينيك..
قوم يا مصري ولادك كنز مصر..ولادك كنز مصري..
كن قدوة لولادك يا مصري. بتصرفاتك وسلوكك وكلامك وعاداتك.…

اشوفك على خير يا مصري..
من اول اتنين في سبتمبر بإذن الله، بعد رجوعي من اجازتي السنوية..
وللحديث بقية.. مع الخطابات..
ولينك الحوار مع دينا فريد هنا..

#مراهق_في_زمن_الكورونا

Share